फतेहगंज थाना मा बाउन्ड्री के मांग
जिला बांदा, ब्लाक नरैनी, कस्बा फतेहगंज। हेंया सन् 1993 मा थाना बना रहै जउन आज भी बाउन्ड्री न होय के कारन खुले मा चलत है। यहिके बाउन्ड्री बनै खातिर कइयौ दरकी पुलिस विभाग मा कहा है, पै कउनौ सुनाई निहाय।
फतेहगंज थाना के अधिकारी अउर करमचारी कहत हैं-“थाना मा बाउन्ड्री न होय से हमार बहुतै नुकसान होत है। थाना गांव से बाहर एकान्त अउर जंगली इलाका मा है। या मारे हेंया अधिकारी आवैं का जल्दी तैयार नहीं होत आय। जानवर तार तोड़ के घुस आवत हैं अउर रात मा डेर के मारे नींद नहीं आवत आय। शाम होय के पहिले हेंया सूनसान होई जात है।” अपर एस.पी. स्वामी प्रसाद बतावत हैं कि फतेगंज नवा थाना आय। होंआ पी.ए.सी. पुलिस सुरक्षा खातिर लगाई जात है। बाउन्ड्री खातिर भी पिछले साल मांग कीन है, पै पास नहीं भे आय। अब अगले साल दुबारा से मांग कीन जई।