बहिगे सब्जी
जिला बांदा, ब्लाक नरैनी, ग्राम पंचायत बरछा बा, मजरा केवटन पुरवा। हेंया 15 जून 2013 से बारिस होय से बागै नदी के किनारे बोई सब्जी बहि गे है। यहिसे सब्जी उगावै वाले मड़ई परेशान हैं।
सब्जी उगावै वाले चुनकू छेदीलाल अउर कल्लू बतावत हैं हम लोग हर साल नदी के किनारे मंहगा बीज लइके सब्जी बोइत हन। बरसात के समय सबै सब्जी नदिया मा बहि जात है पै सरकार हमैं कतौ मुआवजा नहीं देत है। हमार हर बरसात मा हजारन का नुकसान होत है। सब्जी उगावब हमार पुरखन का धन्ध आय। हमरे बच्च का पेट यहै धन्धा से चलत है। सब्जी बही जाय से हमार परिवार भुखमरी के हालत मा आ जात है। सरकार हमरे खातिर कउनौ सुविध नहीं देत है। हमरे पास जमीन भी निहाय। नदिया के रेता मा हम तरोई,करैला,लौकी,भिन्डी,खीरा,ककड़ी जइसे के कइयौतान के सब्जी बोइत है। या साल के बरसात तौ सबै उजाड़ के चली गे। बीजा बोवै के दाम भी नहीं लउटे आय। डेढ़ महीना से बराबर होय वाली बारिस हमार पेट के रोटी छीन लिहिस है। एक सौ पचास रूपिया का सौ ग्राम खीरा का बीज मिलत है अउर वहिमा दवाई छिटै का परत है।
अतर्रा एस.डी.एम. सुनील कुमार वर्मा का कहब है कि सब्जी के बारे मा हम का कर सकत हन। वा उनके खुद के समस्या आय। अगर उनके नाम जमीन होत तौ उनका मुआवजा मिल सकत रहै।