बाढ़ मा फैलत बीमारी

जिला फैजाबाद, ब्लाक पूराबाजार, गावं  मूड़डिहा, सलेमपूर, पूरेचेतन, पिपरी संग्राम। हिंआ 21 जुलाई 2013 कै बाढ़ आवै से हिंआ कै मनईन का कई तरह कै बिमारी हुअत बाय।
मूड़डिहा गावं  कै सुनिता, मालती बताइन कि एक हफ्ता से बाढ़ आय बाय। तबै से हिंआ कै सब मनईन का बिमारी फैलत बाय। फोड़ा, फुन्सी, जुखाम, पेट दर्द, बुखार जैशन बिमारी फैलत बाय। जेसे गेदहरन का ज्यादा तकलीफ हुअत बाय। हिंआ पै ऐनम कै ड्यूटी लाग बाय दवाई दियैं लकिन हम दवाई लिये जाई थी तो कहाथिन कि दवाई खत्म होय गै बाय। रामदुलारी, प्रभावती बताइन कि हमरे गेदहरन कै खुजली भै बाय। अउर कहाथिन कि दवाई खत्म होय गै बाय।
ऐनम गोदामा, किरन मिश्रा अउर माधुरी बताइन कि हिंआ सब प्रकार कै दवाई दिया जात बाय। लकिन बुखार कै दवाई खत्म होय गै बाय। अउर ब्लाक कै सामुदायिक स्वास्थ्य केन्द्र मा बुखार कै दवाई नाय बाय।
सामुदायिक स्वास्थ्य केन्द्र कै डाक्टर मोहम्मद सादिक बताइन कि हिंआ सब प्रकार कै दवाई उपलब्ध बाय। लकिन जब बाढ़ आवा थै तौ हमरे सबका अलग से बजट नाय दिया जात कि हमरे सब दवाई मंगवाई। जवन दवाई अस्पताल मा आवा थै वहीं मा से दवाई दिया जाथै।