बीच शहर के शुलभ शौचालय मा लग ताला
शहर बांदा, मोहल्ला कलेक्टर गंज, कालू कुंआ, चमरौड़ी चैराहा अउर जवाहर नगर। कलेक्टर गंज का सुलभ शौचालय लगभग बीस दिन से बंद परा है। या शौचालय का उद्घाटन 25 जून 2010 मा भा रहै। बाजार करैं आये लोगन का अउर दुकानदारन का शौचालय बंद रहैं से बहुतै परेशानी होत है। चमरौड़ी बस्ती अउर कालू कुंआ चैराहा मा प्राइवेट साधन के स्टाप हैं। स्टाप मा शौचालय न होय से यात्रिन का टट्टी पेशाब खातिर बहुतै परेशानी होत है। जवाहर नगर मा गंदगी का अंबार है।
सुलभ शौचालय के सउहें रहैं वाला चैकीदार कहत है कि सुलभ शौचालय का ठेका का समय खतम होई गा है। अब जबै फेर से बोली लगा के ठेका दीन जई, तबै खुली। शौचालय मा पूरे बाजार अउर सब्जी मण्डी के मड़ई टट्टी पेशाब करैं आवत हैं। चैनल मा ताला पड़ा देख वापस होई जात है। यहिके बारे मा लिख के नगर पालिका मा दई दीन गा रहै, पै विभाग कउनौ कारवाही नहीं करिस आय। दुकानदार सौरभ, अमित अउर सोनिया कहत हैं कि सुलभ शौचालय न खुलै से बहुत परेशानी है। चेयरमैन का फोन कइके भी बतावा गा पै भरोसा के अलावा अउर चुनाव के बाद काम होय के बात सुनैं का मिली है।
बांदा शहर कालू कुंआ। हेंया के प्राईवेट स्टाप इन्चार्ज बबलू खांन बतावत है कि चार स्टाप हैं। सुबेरे सात बजे से रात 9 बजे तक हजारन मड़ई के भीड़ लगा रहत है। दुकानदार नरेश शिवहरे, जौरही गांव का बउवा बतावत रहैं कि हमार कान पक गें रात दिन गाली गलौज सुनत। काहे से अगर यात्री आपन लड़कन बच्चन का भी पेशाब करैं बइठा दिहिन तौ बहुतै लड़ाई होत हैं। जवाहर नगर का बांदा नगर पालिका वाले अपने नगर पालिका मा नहीं मानत आय यहिसे होंआ कउनौ विकास नहीं भा आय। न सफाई कर्मी, न नाली, न राशन कार्ड सबै काम ठप परा है। या समस्या बतावै वाले योगेन्द्र अउर अश्वनी बतावत हैं। बांदा चेयरमैन विनोद जैन का कहब है कि या मोहल्ला हमार नगर पालिका मा नहीं आवत आय। अगर मांग है तौ सफाई कर्मी भेजा जई।
चेयरमैन विनोद जैन का कहब है कि ़़़कलेक्टर गंज वाला शौचालय का रूपिया नहीं जमा आय। अब एक दुई दिन मा कारवाही कइके शौचालय खुलवा दीन जई। नये शौचालय बनवावैं के जघा निहाय। जहां सफाई निहाय तौ सफाई करा दीन जई।