बाँदा में दुश्मनी और दहशत ज़मीनी विवाद पर

जिला बांदा, कस्बा बांदा 10 नवम्बर का अकीर खां का लियाकत खां जान से मार डारिस है। हत्या का कारन जमीनी विवाद बतावा गा है। पुलिस 13 नवम्बर का लियाकत का पकड़ के जेल भेज दिहिस है।
अकीर खां के मेहरिया बद्दी रोवत रोवत बताइस कि मोर मनसवा का लियाकत मारिस है पहिले गोली से मारिस फेर काटिस वहिके बाद जलाइस है। अकीर के महतारी मेडी बीबी का कहब है कि एक दिना लियाकत दुवारे मा ट्रैक्टर लड़ा दिहिस रहै, तबै खपरा फूट गे रहै। तौ वा बन्दूक लइ के निकल आवा रहै तबै लड़ाई का बीच बचाव कइ दीन गा रहै। तबै से मनमुटाव चलत रहै यहै कारन ना मोर लड़का के जान लिहिस है।
छोट भाई अफसर खां बताइस कि लियाकत दोस्ती कइके इनतान का काम करिस है। लियाकत हमार परिवार का सदस्य आय बोर मा दूनौ सोवत रहै। तबै लियाकत मोर भाई अकीर का पेट मा गोली मारिस वहिके बाद गोड मा, फेर भेजा मा मार दिहिस जेहिसे वहिके जान चली गे है। रामप्रताप खेत मा पानी लगावत है। वहिका लियाकत बांध दिहिस रहै। हत्या करै के बाद वहिका छोडिस तौ वा भाग गे मोरे लगे आवा अउर बताइस कि बोर मा आगी लाग गे है। जबै मै हुंवा जा के देखेव तौ भाई के अधजली लाश पड़ी रहै।
एस ,पी श्री पति मिश्रा का कहब है कि पुलिस का जइसे या हत्या का सुराग मिला है। तुरंत लियाकत का पकड़ लीन गा है।

रिपोर्टर- कविता और मीरा देवी

05/12/2016 को प्रकाशित