जिला बांदा, तिन्दवारी, गांव पलरा अउर पैलानी पांच साल से पलरा से पैलानी तक के बारह किलोमीटर सड़क ख़राब पड़ी है। जेहिसे हेंया के मड़इन का बहुतै परेशानी होत है। कइयौ दरकी नेता, मंत्री ,समेत विभाग से कहा गा है। पै आज तक सुनवाई नहीं भे आय।
पलरा गांव के मौलाना मतिन का कहब है कि वइसे तौ बारह किलोमीटर सड़क ख़राब है। पै दुइ किलोमीटर सड़क तौ बहुतै ज्यादा ख़राब है। ख़राब सड़क मा बहुतै धूल उड़त है, जेहिसे कइयौ बूढ़ मड़इन का सांस के बीमारी होई गे हवै। अधिकारिन का कइयौ दरकी सड़क बनवाये का कहि चुके हन अब सुनवाई न होइ तौ चक्का जाम करबै अउर डी एम ,आफिस मा धरना प्रदर्शन करबै। सबरात अउर मुसमी का कहब है कि बच्चा सड़क से निकरत है तौ गिर जात है। सड़क मा बड़े–बड़े गडढा है। जेहिसे गाड़ी ख़राब होई जात है। गाड़ी चले मा बहुतै धूल अउर कंकड़ उड़त है जेहिसे आस पास जउन मड़ई बइठ रहत है उनका बहुतै नुकशान करत है।
स्कूली लड़का मोहम्मद हुफैजा का कहब है कि स्कूली बच्चन का हेंया से निकले मा बहुतै परेशानी होत है नेता, मंत्री चुनाव के पहिले सड़क बनावै का कहत है बाद मा झांकै तक नहीं आवत है।
पी, डब्लयू डी, अभियंता भगवानदास का कहब है कि अप्रैल 2016 मा सड़क का स्टीमेट बना के भेज दीन गा है। या महीना मा फेर से दुबारा भेजा गा है। जइसेन रुपिया आ जई सड़क का काम शुरू होइ जई।
रिपोर्टर- गीता और शिवदेवी
27/12/2016 को प्रकाशित
