जिला चित्रकूट के कर्वी शहर मा पिछले छह महीना से ओबर ब्रिज मतलब पुल बनत हवै। पुल बनै क बाद तौ मड़इन का आवै जाये मा सुविधा होइ जई, पै या समय शंकर बाजार से लइके पुरानी बाजार तक निकरब मुष्किल हवै। सबसे ज्यादा नुकसान दुकानदार का होत हवै।
कर्वी के कौशल शंकर अउर पूरन बताइन कि हमार कपड़ा के दुकान कोठी तालाब के लगे हवै। या समय लगन चलत हवै, पै हमार धन्धा पानी सब ढप्प हवै। काहे से कि रेलवे क्रासिंग बन्द कइ दीन गे हवै। या कारन मड़ई भैरोंपागा कइती से धूम के आवत जात हवै। गल्ला मण्डी के लगभग दस लोग बताइन कि दिसम्बर 2013 से या पुल बनत हवै। पता नहीं कबै बनके तैयार होइ अगर रेलवे क्रासिंग खुल जाये तौ मड़इन का पैदल निकलै मा सुविधा होइ जाये। पुल बनैं से या समय कर्वी के लगभग तीन लाख मड़इन का परेषानी झेलै का परत हवै।
या मामला मा सेतु निगम के अधिकारी अवधेश का कहब हवै कि पुल बनै मा मड़इन का परेशनी उठावै का परी हम तौ जसत खम्भा बनत जात हवै तौ रास्ता बनवावत जइत हन। जेहिसे मड़इन का परेषानी न होइ सकै। पुल देर से बनै का कारन भी मड़ई हवै। काहे से रास्ता बन्द होय के बाद भी मड़ई निकरै का नहीं मानत आय। यहै से काम धीमें होइ जात हवै।