जिला महोबा, ब्लाक जैतपुर, कुलपहाड़ कोतवाली क्षेत्र के एक गांव की महिला को आरोप हे कि दीपचन्द्र पुत्र बाबूलाल पन्द्रह साल के बिटिया खा 12 जून खा भगा के ले गओ हे। ईखी सुचना बेलाताल चौकी ओर कुलपहाड़ कोतवाली में एफ.आई.आर. लिखाई हे। पुलिस बिटिया खा अभे तक नई ढूढ़ पाई हे।
महोबा एस.पी. कुंतल किशोर
ओरत कहत हे कि घर में कोनऊ न हतो, हम लोग मजदूरी करन गये हते। जभे हम शाम खे घर आये तो घर मे कोनऊ न हतो। हम बिटिया खा ढूढ़त रहे। ईखी सूचना हमने चैकी में दई हती। आपने रिस्तेदारन खा फोन करके पुछो तभई पता चलो की टीकमगढ़ जिला, गांव ददुवा को दीपचन्द्र भगा ले गओ हे। हमने कुलपहाड़ कोतवाली में दीपचन्द्र के नाम एफ.आई.आर. लिखाई हे। बिटिया के ढूढ़े में हमाओ दस हजार रूपइया लग गओ हे। पुलिस हाथ में हाथ धरे बेठी हे। कछू कारवाही नई करत हे। एई से हमने 23 जून खा महोबा एस.पी. खा दरखास दई हे।
बेलाताल चौकी इन्चार्ज नन्दराम प्रजापति बताउत हे कि धारा 363 (अपहरण के लाने दण्ड) ओर 366 (शादी के लाने अपहरण) के तहत मुकदमा लिखो हे। अभे विवेचना चलत हे। बिटिया मिल जेहे तो मेडिकल ओर बयान के हिसाब से धारा बढ़ा के कारवाही करी जेहे।