बन रहल हई सी.एच.सी.
जिला सीतामढ़ी, प्रखण्ड सोनबरसा प्राथमिक स्वास्थ्य केन्द्र। उहां भवन न रहे के कारण मरीज से लेके अधिकारी सब के काफी परेषानी होईत रहलई। इ समस्या के ‘‘खबर लहरिया‘‘ अखबार में केतना बेर खबर निकलल रहई। जेकर समाधान अब बहुत जल्दी हो जतई। अब नींव देया गेलई।
प्रसव के लेल आयल महिला नीलम देवी, प्रमीला देवी, कहलथिन कि भवन के अभाव में प्रसव करावे के लेल बड़ी परेषानी होई छई। रूम त हई लेकिन चारों तरफ खुलल हई जब भवन बन जतई तब सब के सुविधा होतई। आषा कर्मी सब कहलथिन कि बहुत दिन से भवन बने के लेल बात होईत रहलई। एक बेर ठिकेदार सब अलई अउर भवन के छत तोड़ के सब छड़ ले गेलई। लेकिन भवन न बनलई अब भवन बन रहल हई।
स्वास्थ्य प्रबंधक विनय भूषण, एकाउण्टेंट नीरज कुमार, बी.सी.एम. सर्वानंद पाण्डे कहलथिन कि हमरा सब के भवन के अभाव में बेड भी सही से न लगई छई। एगो रूम में सब के कार्यालय हई लेकिन कुछ ही दिन के समस्या हई। अब बहुत जल्दी तीस बेड के भवन बन रहल हई। स्वास्थ्य प्रभारी कैपटन राम प्रवेष सिंह कहलथिन कि छौ महीना के अंदर में सी.एच.सी. बन जतई। जेकर वजट तीन करोड़ दु लाख रूपईया आयल हई।