बजट पास होहे, तो बनवा दये जेहें शौचालय

जिला महोबा, ब्लाक जैतपुर, गांव सतारी। एते शौचालय न होय से ओरतन ओर बिटियन खा टट्टी होय खे लाने गांव से बाहर दूर खेतन में जाये खा परत हे। एई से ऊ अपने घरन में शौचालय बनवायें खे मांग करत हें। एसी समस्या होय खे बाद भी प्रधान कोनऊ ध्यान नई देत आय।
गांव की फूलादेवी ओर गुलाबरानी ने बताओ की हमाये गांव की आबादी तीन हजार हे। जीमे पचास आदमियन खे घर में शौचालय बने हें। बाकी ढाई हजार आदमियन खे एते शौचालय नइयां। प्रधान से केऊ दइया कहो हे, ऊ भी कोनऊ ध्यान नई देत आय। ई समय खेतन में पानी भरो हे। काय से आदमी अपने खेतन में पानी लगाये हें। बहू बिटिया कहां टट्टी करे जाय?
तिजुआ कहत हे कि सरकार जब सुविधा देत हे, तो प्रधान खा भी जनता खे लाने सोचे खा चाही। प्रधान अगर शौचालय बनवा देय तो सब दिनन खा आराम हो जेहे। काय से ई मोसम में तो जेसे-तेसे कट जात हे, पे बरसात में बोहतई दिक्कत होत हे।
प्रधान शोभारानी के लड़का नीतेन्द्र सिंह ने बताओ कि लोगन खे घरन में शौचालय नइयां, ई बात सई हे। अभे दो महीना पेहले ब्लाक में प्रस्ताव बना के भेज दओ हे। जभे बजट आ जेहे तो शौचालय बनवा दये जेहें। जीसे आदमियन खे लाने सुविधा हो जेहे।