बजट पास होइ तौ सड़क बनी

जिला चित्रकूट, बलाक मानिकपुर, गांव चन्द्रामारा, पुरवा दुधवनिया अउर गदाखान पुरवा। हिंया सड़क न बनै से निकरै का परेशानी होत हवै। तीन किलो मीटर सड़क तीन पीढ़ी से खराब हवै। रोज का पांच सौ मड़ई परेशान हवै। यहै से ब्लाक प्रमुख श्याम बिहारी का दुइ महीना पहिले दरखास दीने हवै।
दुधवनिया पुरवा के चन्द्रशेखर, काजल गदाखान पुरवा के सुरेश का कहब हवै कि इं पुरवा के सड़क न बनै से मड़ई का निकरै तीन किलो मीटर घूम के जाय का परत हवै। दुइ महीना पहिले ब्लाक प्रमुख श्याम बिहारी का लिखित दीन गे हवै, पै जबै तक कुछौ नहीं भे हवै।
प्रधान पार्वती के मनसवा सुरेश का कहब हन दस दिन पहिले बी.डी.ओ. बेचनराम का दरखास दीने हवै जबै पास होई तौ बनवाय दीन जई। मानिकपुर बी.डी.ओ बेचनराम का कहब हवै चन्द्रा मारा सरैयां इं दूनौ के बीच खैरहाई नाला हवै। इं दुनौ प्रधान मिल के दरखास देय बजट पास होइ्र तौ सड़क बनिहै।
यहिनतान सड़क के दूसर खबर जिला चित्रकूट, ब्लाक रामरनगर, गांव हन्ना विनैका के हवै। हिंया के गनेश, राम अउर कल्लू समेत पांच लोगन का कहब है कि सुरौधा गांव का जाये वाली तीन किलो मीटर सड़क दस बरस से खराब हवै। या समस्या से हजारन लोग परेशान हवैं सड़क बनावै खातिर कइयौ दरकी पी.डब्लू.डी. विभाग अउर मऊ तहसील दिवस मा लिखित दीन गे, पै कउनौ नहीं सुनत आय।
पी.डब्लू.डी विभाग के सहायक अभियन्ता बी.के. त्रिपाठी का कहब हवै, “प्रस्ताव बना के सरकार के लगे भेज दीन गा हवै। हुंवा से पास होई तौ सड़क बनी।”