जांच करैं आय खण्ड शिक्षा अधिकारी
जिला बांदा, ब्लाक बड़ोखर खुर्द, गांव गुरेह। हेंया के दसन मडई 1 अक्टूबर 2013 का बांदा तहसील दिवस मा दरखास दिहिन। दरखास मा लिखा रहै कि पिछले साल स्कूल के बच्चन के डेस का रूपिया प्रधान अउर हेडमास्टर गबन कई लिहिन हैं। जांच कइके कारवाही करैं के मांग कीन गे है।
प्रधान अवधेश कुमार सिंह कहिस कि ड्रेस के रूपिया से मोर कउनौ लेन देन निहाय। यहिके जिम्मेदारी विद्यालय प्रबन्धन समिति के अध्यक्ष अउर हेडमास्टर के है।
गांव के रहैं वाले दीपक सिंह, शंकर अउर देवराज कहिन-“प्राथमिक विद्यालय मा दुई सौ चौरानबे अउर पूर्व माध्यमिक विद्यालय मा एक सौ दस बच्चा हैं। यतने बच्चन का 2012-13 के साल दुई-दुई जोड़ी डेस दें के जघा एक-एक जोड़ी डेस दीन गे रहै। एक-एक जोड़ी डेस का रूपिया प्रधान अउर हेडमास्टर बांट लिहिन हैं। या बात का पता तबै लाग जबै 8 अक्टूबर 2013 का बड़ोखर खुर्द के खण्ड शिक्षा अधिकारी जांच करैं विद्यालय गे रहैं।
प्राथमिक विद्यालय के हेडमास्टर लालमणि अउर पूर्व माध्यमिक विद्यालय के हेडमास्टर निर्मला देवी कहत हैं कि एक-एक जोड़ी डेस बांटै के बाद जउन रूपिया बचा है वा बैंक मा जमा है। बड़ोखर खुर्द के खण्ड शिक्षा अधिकारी चन्द्रपाल कहत हैं कि निर्मला देवी हेडमास्टर के खाता मा रूपिया भी परा है। जउन बच्चन का पिछले साल डेस नहीं मिली उनके बाप महतारी का बोला के डेस देवावा जई। यहिमा प्रधान का भी हाथ है।
बेसिक शिक्षा अधिकारी प्रकाश नारायण श्रीवास्तव कहिन कि जांच कीन जई। जांच के हिसाब से दोषिन के खिलाफ कड़ी कारवाही कीन जई।