बंद परा सरकारी ट्यूबवेल

जिला अम्बेडकर नगर, ब्लाक कटेहरी, ग्राम पंचायत मूसेपुर गिरन्ट। हिंआ सरकारी ट्यूबवेल बिजली कै केबिल खराब होय के कारन राजकीय नलकूप बंद पड़ा बाय। जेसे फसल कै सिचाई न होय से खेती सुखाय जात बाय।
गांव कै विकास, विजय बताइन की यहि टीयूबेल से कइउ ग्रामसभा जइसै घाघूपुर, पियारेपुर डढ़वा, मूसेपुर गिरन्ट कै लगभग सौ किसान सिचाई करत रहिन। शेषमणि, विनोद, रामसुन्दर, आशीष, राकेश बताइन कि जवन बड़े किसान हईन। उनके तौ आपन निजी ट्यूबवेल बाय ओसे सिंचाई कई लियाथिन लकिन जे गरीब किसान बाय अउर जेका खाली सरकारी ट्यूबवेल कै भरोसा बाय, ओकै तौ पूरा फसल सुखाय गै।
प्रधान मदनलाल यादव बताइन कि ट्रांसफार्मर से मोटर चलै वाला जवन केबिल कै तार रहा अक्टूबर महीना से खराब बाय। यहि नाते ई ट्यूबवेल बन्द बाय। यकै सूचना नलकूप विभाग वाले का बतावा गै तौ वै केबिल कै तार खराब बताई कै उतार लइ गइन। कइयौ दाय शिकायत कई गै। लकिन केबिल दूसर बदल कै नाय लगाईन।
नलकूप विभाग कै अपर अभियंता एस.बी. त्रिपाठी बताइन कि मुख्य केबिल लगावै खातिर बिजली विभाग का लिख कै सूचना दई गै बाय लकिन अबही तक केबिल नाय लगाइन।
बिजली विभाग कै अपर अभियंता एस.बी. यादव बताइन कि केबिल छह महीना से नाय रहा एक महीना से खराब बाय। केबिल कै व्यवस्था कईकै लाइनमैन का दई दिहा बाय जल्दी केबिल लाग जाये अउर ट्यूबवेल चलै लागै।