जिला फैजाबाद, ब्लाक बीकापुर, गाँव उमरनी पिपरी के उमरनी पिपरी कै निशा 16 जनवरी का प्रसव के ताई बीकापुर सामुदायिक स्वास्थ्य केंद्र गई। परिवार वाले कै आरोप बाय कि नर्स कि लापरवाही से उनके बच्चे कै मउत होइगै। बीकापुर के जनता के अनुसार येहि सामुदायिक स्वास्थ्य केंद्र मा येसे कइयो घटना होय चुकी बाय।मुख्य चिकित्सा अधिकारी मामला कै जाँच करावे कै बात कहिन।
प्रशूती निशा कै कहब बाय कि पहिले भर्ती करिन फिर कहिन कि हड्डी मा बच्चा फंसा बाय हिंया प्रसव न होय पाये। फैजाबाद लै जा आपरेशन से बच्चा होये। प्रसव कक्ष से बाहर निकरे के पन्द्रह मिनट बाद ही फ़र्स पै बच्चा पैदा होयगे। मामी बच्चा पैदा करवाई बाद मा नर्स आइन।
निशा कै पड़ोसन सुमित्रा कै कहब बाय कि जब हम अस्पताल गयन तौ उनके पास कौनो नर्स या डाक्टर नाय रहिन।बच्चा पैदा हुवय के बाद बच्चा का फैजाबाद लै गईन प्रसूती का वही छोड़ दिहिन।जब तक जिला अस्पताल पहुचीं बच्चा खतम होइगै।
निशा कै मामी ममता कै कहब बाय कि जब हम लै के गयन तौ नर्स बोली बच्चा गन्दा पानी पी लेहे बाय। तीन चार सूई लगाई बच्चा नाय पैदा भए तौ कहिन कि गाड़ी आवत बाय जिला अस्पताल लै जा। बच्चा जमीन पै पैदा होइगा तब तक गाड़ी नाय आय रही।
निशा कै मामा सूबेदार कै कहब बाय कि डिलेवरी मा दिक्कत हुवत रही। नर्स बोली बच्चा गन्दा पानी पी लेहे बाय। निशा काफी कमजोर अहैं ताकत नाय लगाय पावत अहैं। हमरे सबके बस कै नाय बाय एहिसे रिफर करत हई।नर्स प्रभावती कै कहब बाय कि निशा कै बच्चा फंस गा रहा अउर बहुत कमजोरी रही।
सामुदायिक स्वास्थ्य केंद्र कै अधीक्षक डाक्टर फिरोज कै कहब बाय कि महिला का रिफर कीन गा रहा लकिन रिफर करै के बाद बाहर बच्चा होइगै। हम खुद जाएके डिलेवरी करायन। एक घंटा तक आक्सीजन मा रखे रहेंन। जब हालत ख़राब भए तौ रिफर कै दीनगा।
रिपोर्टर- संगीता और मनीषा
Published on Jan 25, 2017
