जिला फैजाबाद, ब्लाक मया, टंडौली प्राथमिक स्कूल के रसोइयन कै आरोप बाय कि पांच महीना से खाना बनावै कै पैसा नाय मिला। कइयो बार प्रधानाध्यापक से कहेन लकिन सुनवाई नाय भए।
रसोइया सुनरी देवी कै कहब बाय कि पांचवा महीना लाग बाय अउर जून जुलाई 2016 कै मानदेय अभी तक नाय मिला।वतनी दूर से स्कूल आवै का पराथै सुबह चाय तक नसीब नाय हुवत।एतनी दूर हम पैसा के तै ही तौ आई थी बिना पैसा काम कैसे चले। हमरेव सब सोची थी कि चार पैसा कै नौकरी मिली बाय समय पै पैसा मिल जाये तौ हमरव खर्च निकर जाये। गेद्हरा के पढाई लिखाई अउर घर कै खर्च कहाँ से चलै। एक हजार रुपया महीना मिला थै उहौ पांच महीना से नाय मिला। बिना दवाई कै एक दिन भी नाय चलि पाईत।
रसोइया दुर्गा देवी कै कहब बाय कि अधिकारी तौ कभो पूछै तक नाय अउते कि केतना दिन काम किहा पैसा मिला कि नाय। प्रधानाध्यापक सिर्फ राशन दे दिया थे अउर कुछ नाय। जब पैसा कै मांग कीन जाथै तौ कहा थे कि तोहरे सबका ज्यादा दै देहे हई।
खंड शिक्षा अधिकारी अरुण कुमार वर्मा कै कहब बाय कि जनपद स्तर पै ही रसोइयन कै मानदेय अबही नाय आय बाय।जैसे ही मानदेय आये भुगतान होय जाये। मई जून महीना छुट्टी कै अवधि हुआथै जेसे वकै अलग से निर्देश हुआथै। अउर अलग से वकै धनराशि भी आवाथै।हर एक स्कूल कै पैसा रुका रहाथै।
रिपोर्टर- संगीता
Published on Jan 23, 2017
