फैजाबाद ज़िले के केरालाल खां का पुरवा गाँव में नहीं बन रहे राशन कार्ड

जिला फैजाबाद, ब्लॉक तारून, ग्रामसभा केरालाल खा। येहि गांव कै मनई राशन कार्ड के ताई परेशान अहै, आनलाईन आवेदन करै के बादौ इनके सबकै राशन कार्ड नाय बना।

बालकराम बताईन की जब कोटेदार के घरे राशन लावै जाय तौ कोटेदार जातिसूचक गाली दियाथिन। अउर कहाथिन तोहरे सब पैतीस किलो राशन पावत हया वही से राजा होइगा हया।छोट जाति के मनई का चमार कहिके गाली दियाथिन।मिश्रीलाल कै कहब बाय की अपने नाम से आनलाईन करवाये रहेन। जब सूची मा नाम रहा तब मिलत रहा। लगभग साल भर से नाय मिलत।  

प्रधान शकुन्तला मिश्रा के पति संत मिश्रा बताईन कि कमसे कम पांच छह ब़ार हम कोटेदार का सस्पेंट करायन, बहाल भईन। अब ई सप्लाई बिभाग कै कमी आय ।कोटेदार हरिनारायण सिंह बताईन की तीन सौ उनीस राशन कार्ड धारक अहै। बावन बी पी एल, सैतिस अन्तोदय अउर बाकी सब पात्र अहै।जेकै सूची मा नाम बाय वका दीन जात बाय।  जे जल्दी मा ऑनलाईन कराये बाय वकै यतना जल्दी सूची मा नाम कैसे आये। जब सूची मा नाम आये तौ दीन जाये।

खाद्य सुरक्षा अधिकारी संतोष कुमार बताईन कि ग्रामीण छेत्र मा राष्ट्रीय खाद्य सुरक्षा 2013 से चलत बाय।पांच गृहस्थी सूची कै अधिकतम लक्ष्य उन्यासी दशमलव पांच प्रतिशत निर्धारित कीन गै बाय।

रिपोर्टर-  आरती और प्रियंका 

फैजाबाद ज़िले के केरालाल खां का पुरवा गाँव में नहीं बन रहे राशन कार्ड