फैज़ाबाद ज़िले में राजापुर ग्राम सभा में राशन की घटतौली से परेशान हैं लोग

जिला फैजाबाद, ग्राम सभा राजापुर। येहि ग्राम सभा मा चालिस साल से एक ही कोटेदार के हाथ मा कोटा बाय। जेसे मनई राशन के घटतौली से परेशान बाटे।  डीएम एस डीएम तक का सुचना दिये के बादौ कोटा उन्ही के पक्ष मा बहाल हुआ थै।

गांव के राजकरन कै कहब बाय की कोटेदार का बदलै का चाही कहे से चालिस साल से लगातार उनही के हाथ मा कोटा बाय जेसे वय राशन कार्ड धारकन का  भगाय दियाथिन। रामशंकर कै कहब बाय की पैन्तिस किलो राशन की जगह तीस किलो दियाथिन। अउर दुई लीटर मिटटी के तेल की जगह डेढ़ लीटर दियाथिन। हर राशन कार्ड के पीछे इहै कराथे।  हम गरीबन का काव मिलत बाय। कहा जाथै की नियम गरीबन के ताई बाय लकिन जे सच कै नियम कै हकदार बाय वका मिलते नाय बाय। इन्द्रपाल कै बेटवा बताईन की पहिले सफ़ेद कार्ड रहा बाद मा ऑन लाइन करायन रसीद भी मिली। जब रसीद लईके राशन लावै गयन तौ कोटेदार कहिन तोहार नाम सूची मा नाय बाय। राशन नाय दिहिन।

सियाराम बताईन की डीएम का अप्लिकेशन दिहन। जनता कै बयान हल्फी बनुवाय के जमा करेंन। तब एस डीएम का आदेश भए। एस डीएम कहिन की कोटेदार अउर जनता दुइनौ तरफ से बयान हल्फी मिली बाय। बयान हल्फी देखिके सत्यता के आधार पै  निस्तारण कीन जाये। लकिन एस डीएम महोदय विधायक अभय सिंह के दबाव मा आइके उनके पक्ष  मा कोटा बहाल कै दिहिन।

पूर्ब जिला पंचायत सदस्य विकास पटेल कहिन की जनता तीन साल के ऊपर होइगा ई लड़ाई लड़त बाय अउर पूरी तरह से पक्षपात कार्यवाही हुवत बाय। कोटेदार के पक्ष  मा हर ब़ार कोटा कै दीन जाथै। हमहू बहुत प्रयास करेंन लकिन अधिकारियन के लापरवाही अउर  बेरुखी से इनका सबका कौनौ न्याय नाय मिल पावत बाय।

रिपोर्टर – संगीता, मनीषा  

फैज़ाबाद ज़िले में राजापुर ग्राम सभा में 40 साल से एक ही कोटेदार है
ग्राम सभा में लोग राशन की घटतौली से परेशान हैं