मृत्यु प्रमाण पत्र देखवईत भगवती देवी
जिला शिवहर, प्रखण्ड शिवहर, गांव कुशहर कस्वा नूनिया टोला, वार्ड नम्बर नौ। उहां भगवती देवी के पति वैधनाथ साह के मरला दु साल हो गेलई। लेकिन इनका अभी तक पारिवारिक लाभ न मिल रहल हई।
उ कहलथिन कि हमरा पति के कैंसर के बीमारी भे गेलक। जेई कारण उ मर गेलथिन। उनका मरला के एक महिना के बाद मृत्यु प्रमाण पत्र के कागज बनबइली अउर पंचायत से लेके प्रखण्ड तक आवेदन जमा कइली। लेकिन हमरा कोई लाभ न मिललक। हमरा चार गो बेटा हय सब अपना-अपना बाल बच्चा के लेके अलगे हई। हमरा कोनो खर्चो न देईय। जेहो रूपईया मिलतियई उहो से त कुछों दिन काम चलतियई। मुखिया, कर्मचारी, वार्ड सदस्य सबके कागज देली सब लोग कहलन कि जाउ आहां के काम हो जायत।, जिनका पास जाइछी उ लोग कागज रख लेई छथिन। लेकिन हमर काम कहा होई छई? अब हम कागज जमा करईत-करईत सब जगह से थक गेली ।
मुखिया ललिता देवी के पति प्रमोद सहनी कहलथिन कि पारिवारिक लाभ के लेल हमरा पास उनकर आवेदन न आयल हई। उहो कागज जमा करथिन त मिल जतई।
प्रखण्ड विकास पदाधिकारी विनय कुमारसरस कहलथिन कि यदि उ फाॅर्म भरले होईथिन त देखे के होतई कि कोन कारण से उनका पारिवारिक लाभ न मिललई।