फांसी लगायके दिहिन जान

जिला फैजाबाद, ब्लाक तारुन। थाना क्षेत्र के दुई अलग अलग गांवं मा दुई मेहरारु फांसी लगायके आत्महत्या कै लिहिन। पुलिस एक शव का कब्जा मा लइके पोस्टमार्टम के ताई भेज देहे अहैं जबकि दूसरी घटना कै जानकारी पुलिस का नाय बाय।
ग्राम सभा बेनीगद्दोपुर निवासी वृजभान कनौजिया कै मेहरारु राधिका पैतालिस साल कै शव घर से दुई सौ मीटर दूर नीम की डाल मा साड़ी के फन्दा मा झूलत बुधवार की सुबह मिला। घरवाले बताइन कि मृतका मंगलवार का शाम गांव के मजरे लाला का पूरा मा गै रही। उनकै पति देर शाम शराब के नशा मा घर आय तौ मेहरारु के वापस आवै पै उनका गाली गलौज दइके पिटाई करिन। पति कै कहब बाय कि मेहरारु का गेदहरनं के पढाई लिखाई पै ध्यान न दियै के ताई फटकार लगावत रहिन। मंगलवार की रात घर कै सब मनई खाना खाइके सोय गा रहे। सुबह जागै पै देखिन तौ उनकै मेहरारु अपने बिस्तर पै लाय रहीं। तलाश शुरू कीन गै तौ गांव वाले सूचना दिहिन कि उसकै शव नीम के पेड़ से लटका बाय। गांव वाले यकै सूचना पुलिस का दिहिन। चैकी प्रभारी रामपुर भगन बीरेन्द्र यादव हमराही सिपाहियन के साथे घटना स्थल पै पहुंचके शव कब्जा मा लै लिहिन। अउर पंचनामा करायके शव पोस्टमार्टम के ताई भेज दिहिन।
जबकि दूसर घटना ग्राम पंचायत नागपाली कै हुवय। गांव वाले बताइन कि राम करन निषाद शराब पीयै कै आदी अहै। नशा मा रोज मेहरारु कै पिटाई करत रहिन। मंगलवार की रात भी पति अपने मेहरारु मुरता देवी पैंतिस साल कै जमके पिटाई करिन। जेसे दुखी होइके खपरैल के बड़ेर मा फांसी कै फन्दा से लटकके जान दै दिहिन। मृतका के सिर परै गम्भीर चोट कै निशान भी रहा। मुरता देवी के मौत कै खबर पाइके पूरा कलन्दर थाना क्षेत्र के भुलई का पूरा निवासी मायके वाले मौके पै पहूंच गये। दुइनौ पक्ष मा करीब पांच घंटा तक बातचीत भै।
थाना प्रभारी पीएन तिवारी बताइन कि मामला कै जानकारी बाय। लकिन लिखित शिकायत न मिलै से कउनौ कार्रवाई नाय कीन गै।