दफ्ती मा लिखे नारा अतर्रा तहसील पहुंचे मड़ई
जिला बांदा, ब्लाक नरैनी, गांव बदौसा। 2 सितंबर 2014 का डी.एम. के अध्यक्षता वाली तहसील दिवस अतर्रा मा बदौसा के लगभग पचास मड़ई प्रधान के खिलाफ नारा लगावत पहुंचे। उनकर कहब रहै कि प्रधान बी.पी.एल. सूची मा शामिल मड़इन के नाम के आगे उर्फ लगा के दुसरे के नाम आवास दई दिहिस है।
सियासखी, चन्दा अउर रमकलिया कहिन-“इन्द्रा आवास के सूची मा हमार नाम है, पै हमार नाम के आगे उर्फ लगा के दुसरे के नाम आवास दई दीन गे हैं। या काम प्रधान, सचिव अउर बी.डी.ओ. के मिली भगत से भा है। हम प्रधान से कइयौ दरकी कहे हन कि हमार नाम सूची मा है, पै प्रधान यहै कहत रहै कि तुम्हार नाम सूची मा निहाय। या समस्या के दरखास हम कइयौ दरकी ब्लाक अउर तहसील दिवस मा दई चुके रहन। या मारे हम डी.एम. का दरखास दीने हन।”
प्रधान लाल चन्द्र कहत है कि चुनाव का माहौल है। या मारे गांव वाले मोर खिलाफ करिन हंै। का एक नाम के दुई मड़ई नहीं होई सकत आय।
नरैनी ब्लाक के ए.डी.ओ. ललिता देवी कहत है कि या मामला के जांच चलत है। या मारे आगे का कारवाही कीन जई कुछ नहीं कहा जा सकत आय।
अतर्रा एस.डी.एम. मनोज कुमार कहिन कि 20 फर्जी इन्द्रा आवास के लिस्ट डी. एम. का भेज दीन गे है। उंई कारवाही करिहैं।