प्रधान पुष्पा अउर साफ गांव
जिला चित्रकूट, ब्लाक मऊ, गांव कलचिहा मजरा सुचेता कालोनी। कलचिहा ग्राम पंचायत बरगढ़ क्षेत्र मा आवत हवै। बरगढ़ क्षेत्र मा उन्नीस ग्राम पंचायत हवैं। जेहिमा कलचिहा भी शामिल हवै। कलचिहा ग्राम पंचायत मा तीन पुरवा हवैं। सुचेता कालोनी मा खबर लहरिया पत्रकार गई तौ देखिन कि गांव बहुतै साफ सुथरा रहै। सड़क, नाली हैण्डपम्प, बिजली अउर स्कूल सब चीजन के व्यवस्था पूर पूर देखै का मिली। साथै गांव के लोग प्रधान के बहुतै बड़ाई करिन। या देख खुशी भे कि अबै भी काम करवावै वाले प्रधान हवै। या बात का लइके प्रधान पुष्पा अउर वहिके मनसवा सुखेन्द्र से बात चीत भे।
उंई बताइन कि हम पहिली दरकी चुनाव लड़े हौं अउर सौ मा पनचानबे वादा पूर करे हौं। जनता का कउनौ दुख नहीं आय। या ग्राम पंचायत के आबादी पैतिस सौ हवै। ग्यारह सौ वोटर हवै। एक सौ अड़तिस आवास बनवाये हौं। विधवा पेंशन ग्यारह, वृद्धा पेंशन चैबिस, महामाया साठ, जमीन का पट्टा अस्सी लोगन का,हैण्डपम्प पैंतालिस अउर जाब कार्ड तीन सौ अड़तिस हवैं। मैं पंडित जरूर हौं, पै कत्तौ भेदभाव नहीं कीने आहूं। मैं जीते हौं तौ दलित आदिवासी के बल से अब डेढ़ बरस अउर बचा हवै तौ बचा काम नींक से करवाइहौं। साढ़े तीन बरस मा मनरेगा खातिर सत्तर लाख रूपिया बजट मिला हवै। राजवित्त के काम खातिर दस लाख रूपिया आवा हवै।