जिला चित्रकूट, ब्लाक रामनगर, गांव सिकरी। हिंया के प्रधान सुषीला देवी हवै। वा दलित जाति के हवै। गांव के आबादी लगभग पांच हजार हवै। खबर लहरिया पत्रकार उनके पांच साल के कार्यकाल मा कराये गे विकास के कामन का लइके गांव के लोगन से बातचीत करिन तौ पता लाग कि का विकास हवै।
हिंया के माता बदल का कहब हवै कि गांव मा नाली, खड़ण्जा नहीं बना हवै। यहिसे बारह महीना कांदौ भरा रहत हवै। अपने दुआरे बइठ नहीं पाइत हन। प्रधान सुषीला देवी नाली खड़ण्जा नहीं बनवाइस हवै। अब या पंचवर्षीय मा प्रधान का एकौ वोट न देइबे।
कल्लू कहिस कि हैण्डपम्प खराब हवै। यहिसे पानी भरै खातिर लगभग एक किलो मीटर दूर पानी भरै जाये का परत हवै। प्रधान का या सोच के जीतावा गा रहै कि वा विकास करवाई, पै विकास के नाम मा एकौ खड़ण्जा न तौ हैण्डपम्प लगवाइस अउर न बनवाइस हवै।
प्रधान सुशीला का कहब हवै कि दलित जाति के होय के कारन मड़ई मोहिका दबावत हवै ऊपर से विकास का काम भी नही करवावै देत रहै। यहिसे मैं हिम्मत करेंव अउर विकास करवाये हौं। गांव मा नाली, खड़ण्जा अउर रुखमीनिया, पिपरिहा अउर खटकन तालाब का सुंदरीकरण करवाये हौं। तीन किलो मीटर मिट्टी का कच्चा काम अउर पचासी हैण्डपम्प गांव मा लगवाये हौं। अगस्त के महीना मा रातो रात नाली बनवाये हौं। मड़ई यहिनतान कहत हवै तौ का कीन जाये। बजट के बारे मा मोहिका कउनौ जानकारी नहीं आय। काहे से कि मैं पढ़े लिखे नहीं आहूं। रामनगर ब्लाक के बी.डी.ओ. राकेश सोनी का कहब हवै कि प्रधान के जांच कराई जई। अगर सही पावा गा तौ कारवाही कीन जई।