पेड़ गिरा, हालत भे गम्भीर

जिला चित्रकूट, ब्लाक मानिकपुर, गांव खिचरी। हिंया के रहैं वाला चुन्नी लाल 15 सितम्बर 2014 का भरवरिया जंगल मा लकड़ी काटैं गा रहै। वहै समय महुआ का सूख पेड़ चुन्नी लाल के ऊपर गिर गा। यहै से वहिके पेशाब अउर टट्टी से खून जाये लाग। वहिके मेहरिया ऊषा देवी इलाज करावै मानिकपुर सामुदायिक स्वास्थ्य केन्द्र लइके गे, पै केन्द्र मा डाक्टर इलाज नहीं करिन।
गांव के ऊषा देवी का कहब हवै कि मैं अउर मोर मनसवा चुन्नी लाल जंगल से लकड़ी काट के बेंचित हन। रोज के जइसे 15 सितम्बर 2014 का भरवरिया जंगल से लकड़ी काटत रहेन। लकड़ी काटत थक गयेन तौ महुआ के पेड़ के नीचे रूक गयेन। जइसेन रूके तौ महुआ का पेड़ चुन्नी लाल के ऊपर गिर गा। पेड़ गिरैं से चुन्नी लाल के तबियत खराब होइगे।
मानिकपुर सामुदायिक स्वास्थ्य केन्द्र के चिकित्सा अधीक्षक प्रदीप कुमार का कहब हवै कि चुन्नी लाल के हालत गम्भीर रहै। यहै से वहिका इलाहाबाद के स्वरूपरानी अस्पताल लइ जाये का कहा गा रहै।