घर से बेघर
जिला चित्रकूट, ब्लाक रामनगर, गांव बल्हौरा। हिंया 14 अप्रैल 2014 का खलिहान मा आगी लाग गे। जेहिसे उन्नीस किसानन के घर जल के राख होइगे। या मामला मा राजापुर एस.डी.एम ए.के श्रीवास्तव सत्तरह लोगन का आर्थिक सहायता खातिर तीन सौ से लइके बीस हजार रूपिया तक के चेक मड़इन का दिहिन। प्रशासन तौ मड़इन का सहयोग करत हवै, पै नेता मंत्री आज तक गांव नहीं आय आहीं।
भजन अउर राम कहिन कि चुनाव का माहौल हवै पै हम गरीबन का कउनौ नेता देखै तक नहीं आवा कि हम कसत हन। प्रधान अउर कोटेदार न होत तौ हमार का होत? रामनाथ, चुनवाद अउर बिदुराई बताइन कि आगी लागै का कारन नहीं पता लाग आय न कउनौ उम्मीदवार हमका ढाढ़स बंधावै आवा आय वोट लें अई तौ भगा देब।
प्रधान अखिलेश बताइस कि आगी लागैं से उन्नीस किसान के लाखन रूपिया का नुकसान भा हवै। हम से जउन मदद बनी हवै वा करित हन। दूनौ जून किसान के परिवारन का खाना भेजित हन। लेखपाल जय सिंह का कहब हवै कि रिर्पोट जांच के बाद तैयार कीन जई। वहिके बाद पता लागी कि केहिकर केत्ता नुकसान भा हवै। अबै तौ किसानन का खुदै होश नहीं आय।
ब्लाक मऊ, गांव छिवलहा। हिंया 12 अप्रैल 2014 का खलिहान मा आगी लाग गे। या कारन आठ मड़इन के चना अउर गेहूं जल गा हवै। यहै से लाखन रूपिया का नुकसान होइगा।
गांव के रामदास पाल का चार बोरा गेहूं, शिवभवन गौतम का पांच बिगहा जमीन का चना नरेन्द्र प्रसाद दुइ बिगहा अउर देवराज दुइ बिगहा बाबूलाल के दुइ बिगहा जमीन मा चना रहै। वा सबै जलगा हवै। यहिनतान राममिलन के एक बिगहा जमीन मा चना वा भी जलके राख होइगा हवै। उंई सबै कहिन कि भूंखन मरै के कगार मा पहुच गये हन। तहसीलदार कतवारूराम अउर लेखपाल कृष्णा औतार आय रहैं। उंई छह लोगन का सर्वे करिन हवै। जबैकि आठ लोगन के खलिहान मा आगी लाग रहै। तहसीलदार कतवारूराम का कहब हवै कि गल्ला मंडी समिति मा लिख के भेज दीन गा हवै। सरकार कइती से मुआवजा पास होइ तौ मिली।