पुलिया टूटै से लागत जाम

जिला बांदा, ब्लाक बबेरू, कस्बा बबेरू अउर तिन्दवारी ब्लाक का गांव बरेठीकलां। बबेरू से तिन्दवारी जाय वाली सड़क बबेरू गल्ला मण्डी के सउहें पुलिया टूट है। जेहिसे साधन निकरैं मा बहुतै दिक्कत होत है। दूनौ कइत से जाम लाग जात है। दोहतरा से बरेठीकलां जाय वाली सड़क के पुलिया 28 जुलाई 2013 से टूट परी है।
बबेरू कस्बा के दुकानदार राकेश कुमार, कामता, मोतीलाल बताइन कि जून मा जबै एक हफ्ता पानी लगातार बरसा रहै तबै गायत्री नगर मोहल्ला के घर पानी से चारौ कइत से घिर गे रहैं। बबेरू एस.डी.एम. आर.के श्रीवास्तव अउर प्रधान रामफल त्यागी मौके मा आ के सड़क के पुलिया का तोड़वा दिहिन। तबै से पुलिया टूट परी है अउर गायत्री नगर का पानी भी वहिनतान भरा है। आधी सड़क से साधन निकरैं मा दुघर्टना होय का डेर है। पी.डब्लू.डी. प्रान्तीय खण्ड के सहायक अभियन्ता ओ.पी. सिंह का कहब है कि मोहल्ला मा पानी भरैं से एस.डी.एम. बबेरू पुलिया कटवा दिहिन रहै। सड़क के एक कइत से मड़ई निकरत है। बहुतै जल्दी पुलिया बनवा दीन जाय, पै बजट निहाय।
यहिनतान के समस्या बरेठीकलां के भी है। बांदा से चिल्ला वाली सड़क मा दोहतरा गांव है। दोहतरा से बरेठीकलां जाय वाली सड़क प्रधानमंत्री ग्रामीण योजना के तहत बनी है। या सड़क के पुलिया 28 जून 2013 के बारिश से टूट गे। मड़इन का अउर पढ़ै वाले लड़का बिटियन का बहुतै परेशानी होत है। पढ़ै वाले अर्चना, राजू, अमित, शनि अउर चुन्नी कहिन कि उनका तीन किलोमीटर के जघा छह किलोमीटर का रास्ता चलैं का परत है।
प्रधानमंत्री ग्रामीण सड़क योजना विभाग के अधिषाशी अभियन्ता एन.के. त्रिपाठी कहिन कि बरसात के बाद पुलिया बनवा दीन जई।