या पुलिया से रोज निकरत चार गांव के मड़ई
जिला बांदा, ब्लाक तिन्दवारी, गांव पदारथपुर। हेंया दुई महीना से पुलिया का एक पाइप निहाय। या मारे पुलिया मा दलदल मचा रहत है। तीन चार गांव के मड़ई वा पुलिया से निकरैं का मजबूर है।
बृजलाल, चन्दा अउर बिन्दा कहत हैं कि वा पुलिया टूटै से गोड़ बिछुल जात है। पुलिया के अइत कइत के गहिरान मा गिर जाय का होत है।
23 सितम्बर 2013 का बरेठीकलां से आई अर्चना या पुलिया मा बिछुल के गहिरान मा घुस गे रहै। वा बताइस कि मैं पदारथपुर गांव आपन बुआ के हेंआ जात रहौं तौ गिर गई हौं। मोरे करिहां मा बहुतै जोर के चोट आ गे है। मड़ई प्रधान से पुलिया बनै के मांग करिन हैं।
पंचायत मित्र मुखिया का कहब है कि बरसात मा पूरे गांव का पानी या पुलिया से निकरत है। या मारे यहिके माटी कट गे है यहिसे पाइप के अइत-कइत गहिरान होई गा है। माटी सुखाय जाय के बाद पुलिया बनवावैं का काम कीन जई।
