पानी के समस्या का लइके फूटत आय दिन लोगन का गुस्सा

जिला बांदा। सदर तहसील क चहितारा गांव मा गर्मी अउर पानी के समस्या से बेहाल लोग 2 मई का कलेक्ट्रेट मा प्रदर्शन कइके जिलधिकारी का दरखास दइके पानी के समस्या दूर करावैं के मांग करिन।
जेहिमा राजकरन अउर दीपक कहिन कि गांव मा बनी पानी के टंकी मा पाइप लाइन से पानी के सप्लाई न कीन जाय से लोग बूंद बूंद पानी खातिर तरसत हैं। अगर या समस्या का जल्दी समाधान न करावा गा तौ हम लोग भूख हड़ताल मा बइठ जइबे। डी.एम. का दीन गे दरखास मा उंई कहिन कि गांव मा 10 साल पहिले पानी के टंकी का निर्माण भा रहै अउर पाइप लाइन भी बिछवाई गे रहै। यहिके बाद भी आज टंकी नहीं भरी गे न पाइप लाइन का कउनौ इस्तेमाल कीन गा। अब गर्मी अउर सूखे के कारन लोग बूंद बूंद पानी का तरसत हैं। जब सरकार लाखन रूपिया खर्च कइके पानी के टंकी बनवाइस है अउर पाइप बिछे हैं, तौ यहिका चालू करावा जाय। जेहिसे लोगन के घरन मा पानी जा सकै।
ड़ी.एम. योगेश कुमार तुरतै जल संस्थान के अधिशाषी अभियन्ता का अदेशित करिन कि जल्दी पानी के टंकी चालू कराई जाय अउर मौके मा जा के जांच कीन जाय। जेहिसे लोगन के पानी के समस्या हल होई सकै।

रिपोर्टर – गीता