जिला चित्रकूट, ब्लाक कर्वी, गांव गोण्डा। 23 अप्रैल का समाजवादी सूखा राहत के तहत तहसील सभागार मा किट बंटे हवैं,पै हम लोगन का किट नहीं मिले आय। यहिसे उंई जिला पूर्ति विभाग मा 24 अप्रैल का शिकायत करिन हवैं।
गांव गोण्डा , कबरा पुरवा के सुंदी अउर सियारानी का कहब हवै कि हम लोगन का समाजवादी सूखा राहत के तहत किट नहीं मिला आय। जबैकि पात्र मड़ई आहिन। कोटेदार मदन मोहन शुकला हमार नाम सूची से हटवा दिहिस हवै। अगर समाजवादी सूखा राहत के तहत सामान मिल जात तौ कुछौ सहारा होइ जात।
शिवगांपाल कहिस कि मैं विकलांग अउर बूढ़ मड़ई आहूं। दूनौ आंखिन से देखाई नहीं देत हवै। यहिके बादो मोहिका समाजवादी सूखा राहत के तहत किट नहीं मिली आय। यहिसे परेशान रहत हौं। येत्ती उम्र मा होथ गोड़ नहीं चलत आय कि कउनौ काम धंधा कइ सकौं।
कोरारी पुरवा के कलावती भी आपन बीती कुछ इनतान बताइस कि मोरे एकौ बिसुवा जमीन नहीं आय। रोज के मेहनत मजूरी कइके आपन परिवार वालेन का पेट भरत हौं । मोहिका सूखा राहत का किट नहीं मिला।
कोटेदार मदन मोहन शुक्ला का कहब हवै कि छांछठ लोगन के सूची बना के दीने रहौं, पै किट कम रहैं। यहिसे पांच लोगन का किट से नाम काट दीन गें हवैं। गंाव मा कुल इकसठ लोगन का समाजवादी किट मिला हवै। जिला पूर्ति विभाग के डी.एस.ओ. देवीदीन कहिन कि लिखित मिली हवै। सराकर के लगे सूची बना के भेजी जई।