चित्रकूट जिला मा 25 मई का तेज आंधी आवै के कारन सैकड़न पेड़ गिरगें। यहिसे कर्वी ब्लाक गांव पहरा के रमपुरवा मा एक चौदह साल के लड़का शत्रुघन के दरे मा मउत होइगे हवै।
ब्लाक कर्वी, गांव रमपुरवा के 14 साल के लड़का शत्रुघन के ऊपर 25 मई का आंधी आवैं से आम का पेड़ टूट के गिर गा यहिसे वहिके दरे मा मउत होइगे। सूचना मिलते शिवरामपुर अउर भरतकूप चौकी के पुलिस मउके मा पहुंची। लाश का पंचनामा कइक पोस्ट मार्टम खातिर भेज दीन गा रहै।
शत्रुघन के महतारी मुन्नी कहिस कि मनसवा राम विलास तीन साल पहिले खतम होइगा रहै। चार लड़का दुइ लड़की रहै। शत्रुघन दूसरे नम्बर का लड़का रहै। 25 मई का शत्रुघन भइंस चरावै खेत गा रहै। तेज आंधी आवैं से पेड़ टूट के लड़का के ऊपर गिर गा। या बात हमका आ के दूसर लड़का बताइस। जबै तक हुंवा पहुंचे तबै तक वा मर चुका रहै। मउके मा तहसीलदार आय रहैं।
कर्वी एस.डी.एम. रजनीश कुमार सिंह कहिन कि चार लाख रुपिया का मुआवजा दीन जई।
ब्लाक मानिकपुर, गांव गढ़चपा 25 मई को सुबेरे 7 बजे 38 साल का विकास बगीचा गा रहै। अचानक गाज गिरै से मउके मा मउत होइगे।
या बताइस विकास का बाप। कर्वी चीर घर का फार्मासिष्ट रावेन्द्र सिंह कहत हवै कि 25 मई का तीन केस आय रहैं। यहिमा से दुइ दैवीय आपदा, एक एक्सीडेंट का रहै।
रिपोर्टर – खबर लहरिया ब्यूरो