जिला बांदा, ब्लाक नरैनी, क्षेत्र नरैनी। नरैनी क्षेत्र के कइयौ गांव के मड़ई लोहिया ग्रामीण सेवा परिवहन बसन मा किराया बढ़ावैं का विरोध करिन। परिवहन विभाग शासन का आदेश पालन के बहाने से किराया बढ़ावैं के कारन का सही जवाब नहीं दिहिस।
देवरार गांव का रामशरन, मुरवां गांव का कमलेश अउर बरछा का देवीदीन का कहब है कि बांदा से नरैनी का किराया तैतीस रुपिया है। जबै से राममनोहर लोहिया बस चली रहैं तौ पचीस रुपिया किराया लागत रहै। गरीब अउर काम धंधा वाला मड़ई इं बसन मा सफर करैं खातिर इंतजार करत रहा है।
परिवहन विभाग के सुपरवाइजर के.एन. मिश्रा का कहब है कि या जवाबदेही मा हम कुछ नहीं कही सकित आय। प्रशासन ही किराया घटावत बढ़ावत है।
उत्तर प्रदेश सरकर कइत से बांदा जिला के नरैनी क्षेत्र मा लोहिया ग्रामीण सेवा परिवहन के ग्यारह बस चलाई गई रहैं। इं बसन मा दूसर बसन से अपेक्षा पचीस प्रतिशत किराया कम लागत रहै। 29 जुलाई से इं बसन का किराया भी बढ़ा दीन गा है।