पत्नी के हत्या कै आरोपी गिरफ्तार

जिला फैजाबाद, ब्लाक तारुन, ग्रामसभा सिरसानियाजपुर बनकठवा। 2 दिसम्बर का एक पति अपने पत्नी कै शिर ईंटा से कूंच-कूंच के मार डारिस। घरवाले कै अनुसार अपने मेहरारू के ऊपर शक करत रहे।
मृतक आशा देवी कै सास चन्द्रावती अउर देवरानी पूनम देवी बताइन कि उनकै पति राजमन बहुत शक करत रहे। आये दिन मेहरारू का मारत पीटत रहे। अगर हमरे घरे गंाव कै केहू आदमी या लड़का आय जाए तौ अपने मेहरारू का मारै। कहैकी तुहि बुलाये रहिव तबै आय रहे। रोज-रोज के प्रताड़ना से तीन साल से अपने मायके करनाईपुर मा रहत रहीं। सास कै कहब बाय कि हम आपरेशन कराये रहेन तबै लियाय लाय रहेन। अबहीं ज्यादा दिन आये नाय भै। बुधवार का दस-ग्यारह बजे के बीच रात मा ईटा अउर गेड़ासा के बेंट से कूंच के मारि डारिन। जब सब सोय गइन तौ सबके घर के दरवाजा कै कुण्डी बाहर से बन्द कै दिहिन। जेसे केहू दौरि न पावै। जब गेदहारै दउरिन तौ उनहूं सबका मारिन। कउनेव तरह जब तक घर खोलवाय गै तब तक मारि डारिन। अउर जब तक सब पहंचिन भागि गये। लकिन शुक्रवार का पुलिस फैजाबाद से पकरि लिहिस। छोट-छोट पांच गेदहरै बाटे। आंचल, गुन्जन कोमल रितिक अउर अंशिका। चार गेदहरै नाना के हिंआ अउर एक दादा, दादी के साथे बाय। जेकरे मन मा यतना डर समान बाय कि अबहीं तक घर मा नाय जात।
हैदरगंज थाना प्रभारी कमलापति ओझा बताइन कि अपने मेहरारु पै शक मा अपने मेहरारु का मारि डारिन। 302 (हत्या) कै मुकदमा दर्ज कइके आरोपी का जेल भेज दीन गै बाय।