चित्रकूट जिला, ब्लाक कर्वी, गांव पतौड़ा के दूरी कर्वी से लगभग तीस किलो मीटर हवै। गांव के आबदी लगभग एक हज़ार चार सौ अउर वोटर साढ़े सात सौ हवै। या गांव सन् 2014-15 मा डाक्टर राम मनोहर लोहिया गांव भा रहै, पै गांव मा विकास के स्थिति खराब हवै।
गांव का कोमल यादव कहिस कि कुंआ के सफाई नहीं भे आय न तौ कुंआ मा गलारी फंसावै वाले खम्भा बने आय। यहिसे पानी भरैं मा डेर रहत हवै कि कउनौ कुंआ मा न गिर जाये।
नत्थू प्रसाद कहिस कि खेरापति तालाब का सुन्दरीकरण नहीं भा। तालाब मा मड़इन के निस्तार का गंदा पानी जात हवै। प्रधान शिवऔतार का पांच साल पूर होय वाला हवै, पै गांव मा विकास के समस्या जस के तस हवै।
अर्चना कहिस कि एक किलो मीटर रास्ता नहीं बनी।
प्रधान शिवऔतार कहिस कि हैण्डपम्प तैतिंस, शौचालय तिरान्बे, लोहिया आवास एक, इन्द्रा आवास आवा रहै। राजवित्त के तहत कुल पांच लाख रूपिया आवा रहै। वहिमा रास्ता बनवावये हौं हैण्डपम्प के मरम्मत खातिर दुइ लाख रूपिया बजट मिला रहै। तालाब का सुन्दरीकरण करावैं खातिर बजट नहीं रहै।
सी.डी. ओ. मुजाहिदुल एहसन कहिन कि जांच कीन जई। प्रधान से कहा जई कि विकास के काम काहे अधूरे हवैं। का यहिके खातिर बजट नहीं रहै।