जिला चित्रकूट, ब्लाक कर्वी, गांव अकबरपुर, अमर ज्योति बस्ती। हिंया के दलित मुन्नी का आरेप हवै कि प्रधान उर्मिला सिंह पंचायती राज का पंचवर्षीय पूर होय वाला हवै, पै बस्ती मारहै वालेन का एकौ कालोनी प्रधान नहीं दिहिस। यहिके खातिर कइयौ दरकी कालोनी के मांग कीन गे, पै कउनौ ध्यान नही दीन गा ।
बस्ती के माया अउर कुंवरिया कहिन कि हमरे लगे एकौ बिसुवा जमीन नहीं आय कि अपने से रहै खातिर घर बनवा लेइ। या कारन से झोपड़ी बना के रहित हन। गीता अउर माया कहिन कि ठेला मा गिट्टी भरै का काम करित हन। जंगल से लकड़ी काट के चूल्हा जलाइत हन। गरीबी हमार कमर तोड़े हवै। येत्ती कमाई नहीं कि जमीन खरीद के घर बनवा सकै। प्रधान गरीबन का ध्यान नहीं देत। प्रधान का वोट लें का रहै तौ वादा करिस रहै कि सरकार के हर योजना का लाभ देवावा जई।
प्रधान उर्मिला सिंह का मनसवा ध्यान सिंह कहिस कि सरकार के लगे से तीन कालोनी आई रहै तौ दइ दीन गई हवै। सी. डी. ओ. मुजाहिदुल अहसन कहिन कि बस्ती मा जांच कराई जई कि मड़ई पात्र हवैं तौ उनका कालोनी काहे नहीं मिली।