जिला कृषि पदाधिकारी प्रवीण झा
जिला सीतामढ़ी, प्रखण्ड रीगा अउर सोनबरसा। उहां के किसान सब के कहना हई कि यूरिया खाद न मिल रहल हई। जेई कारण किसान सब काफी परेशान छथिन।
रीगा के विणा देवी, महेन्द्र राम, कुशमी देवी कहलथिन कि पैक्स द्वारा यूरिया खाद न मिल रहल हई। जेई कारण फसल बर्बाद हो रहल हई। हम सब बटाई खेती करई छी। दूर-दूर से खाद ला के पटबई छी। ओई से खेती में घाटा लग जाई छई।
सोनबरसा के किसान लालबाबू राय, राम प्रित महतो, किशोरी साह कहलथिन कि जब-जब धान या गेहूं में खाद डाले के होई छई तब-तब यूरिया खाद के कमी हो जाई छई। जहां चार सौ में खाद मिले के हई उहां छह सौ, आठ सौ में खाद खरीद के खेत में डालई छी। एक त किसान मौसम से मार खा जाई छई त दोसर खाद के कमी से किसान कहीं के न रह जाई छई।
रीगा के पैक्स अध्यक्ष अउर व्यावार मंडल के अध्यक्ष चंदेश्वर पूर्वे कहलथिन कि अभी तक कोनो पैक्स अध्यक्ष के खाद न मिलल हई। त हम सब किसान के कहां से खाद देबई?
जिला कृषि पदाधिकारी प्रवीण झा कहलथिन कि दोसर खाद के कमी न होई छई। जईसे ही कम्पनी से अबई छई हम भेज देई छी। यूरिया खाद के खपत ज्यादा होये के कारण यूरिया के कमी हो जाई छई।