नाला बनैं मा लाग रोक

जिला बांदा, ब्लाक नरैनी, कस्बा अतर्रा। हेंया के कइयौ मड़ई बताइन कि दुई महीना से अट्ठारह सौ मीटर लम्बा अउर पचपन फुट चैड़ा नाला का काम बंद पड़ा है। 20 जनवरी 2015 तक अतर्रा तहसील मा दरखास दिहिन हैं।
सुमन, अनीता, राधा अउर हाजिद अली बतावत हैं कि अतर्रा पोस्ट ग्रेजुएट कालेज से मिर्जापुर राइस मिल तक बड़ा नाला बनैं का है। नाला बनैं खातिर पैंतिस लाख रूपिया का बजट आवा है। पी.डब्लू.डी. के जमीन मा नगर पालिका वाले नाला बनवावत हैं। कल के दिन अगर पी.डब्लू.डी. सड़क का चैडी़करण कराई तौ नाला टूट जई। अतर्रा एस.डी.एम. का नवम्बर 2014 मा नाला का सही जघा मा बनवावैं खातिर दरखास दीन है। एस.डी.एम. काम तौ रोकवा दिहिन, पै काम शुरू नहीं कराइन। नाला खुदा पड़ा होय से दुकानदारन का आपन रोजगार चलावैं मा दिक्कत होत है। हमेशा नाला मा गिरैं का खतरा बना रहत है।
नगर पालिका अध्यक्ष पुष्पा जाटव का कहब है कि या मामला मा काम शुरू करावैं खातिर नगर पालिका बांदा का लिखित भेजी गे है। होआं से जवाब नहीं मिला आय। या मारे काम रूका है।
एस.डी.एम. अतर्रा मनोज कुमार कहिन कि वा जमीन के नाप करा के नगर पालिका के जमीन मा नाला बनवावा जई।