लक्ष्मी
कमलेश अउर लक्ष्मी
जिला महोबा ब्लाक जैतपुर गांव बुधवारा एते के कमलेश ने हिस्सा न देय ओर मारपीट करे पे, ससुराल वालेन के खिलाफ 19 मई खा कुलपहाड़ तहसील दिवस में एस.पी. खा दरखास दई हे। आपन हिस्सा दिबाये ओर कानूनी कारवाही की मांग करी हे।
कमलेश ने बताओ कि पांच साल पेहले मोओ आदमी गोबरधर खत्म हो गओ हतो। जेठ ओर देवर मोओ हिस्सा नई देत हतो। मोये छोट-छोट तीन बच्चा हे में किते लेके जाओं। पांच महीना पेहले हिस्सा न देत हते तो मेने खेत में सिंचाई न करन दई हती। जीसे मोये मारो हतो। ईखी दरखास अजनर थाना में दई हती। जीसे रास्ता में छेक के जेठ लक्ष्मीप्रसाद, ऊखो लड़का विमलेश ओर जेठानी सुधा ने मारो हतो। एई से मेनें 19 मई खा तहसील दिवस में दरखास दई हे। दई दरखास में लिखो हे कि अगर न्याओ न मिलहे तो एस.पी आवास जा फिर अजनर थाना के सामने मिट्टी को तेल डार के आत्म हत्या कर लेहों। एस.पी. कुन्तल किशोर ने जांच कर न्याओ दिबाये की बात कही हे।
कबरई ब्लाक के करहरा गांव के लक्ष्मी दो बच्चन लेके 16 मई खा डी.एम. वीरेश्वर सिंह खा दरखास दई हे। लक्ष्मी ने कहो कि आदमी खा मरे पांच साल हो गये। ससुराल वाले घर ओर खेती में हिस्सा नई देत हे। मायके जात हो तो कछू समान नई ले जा देत हे। कहत हे कि तोये बाप को नोय।
ससुर उत्तम यादव बताउत हे की ऊ खुद नई रहे चाहत हे, हमने पूरो हिस्सा दओ हे। कहत हे की मे अपने मायके में रहो ओर पूरो समान भर के जात हे। डी.एम. वीरेश्वर सिंह ने कहो कि जा घरेलू मामला हे हम कछू नई कर सकत हे।