काम की करत मांग
जिला महोबा, ब्लाक चरखारी, गांव ऐंचाना। ई गांव की ओरतन खा मनरेगा के तहत काम नई मिलत आय। जीसे ऊं सबने मिलके 1 अक्टूबर 2013 खा तहसील दिवस में दरखास दे के काम की मांग करी हे।
गीता, राधा, मुन्नी के साथे दसन ओरतन ने बताओ हे कि हमाये जांब कार्ड पूर्व पंचवर्षी में बने हते। जीमें सरकार को जा नियम हतो कि मनरेगा के तहत ओरत ओर आदमीयन खा बराबर गांव में ही काम दओ जेहे, पे अभे खाली परे हे।
ललता बताउत हे कि में पिछले साल काम करे गई हती, तो प्रधान ने भगा दओ हतो। ऊखों आरोप हे कि हमाये जांब कार्डन में काम नई मिलत आय। अगर काम मिलत हें तो दस बाई दस की खन्ती खोदे खा दई जात हे। हम ओरते खन्ती नई खोद पाउत आय। काय से खन्ती की माटी बोहतई कड़ी खुदत हे। एई कारण फावड़ा नई चला पाउत हें। एई से हम ने 1 अक्टूबर 2013 खा तहसील दिवस में मनरेगा के तहत खन्ती से दूसरो काम मिले की मांग करी हे।
प्रधान राहुल ने कहो कि मोये गांव में 379 जांब कार्ड हें। जीमें 150 आदमी काम करत हें। जीमें ओरतन खा भी काम दओ जात हे।
बी.डी.ओ. प्रदीप कुमार पाण्डेय ने बताओ कि अभे हमाये एते कोनऊ दरखास नई आई आय। अगर दरखास आई हो हे तो ओरतन खा काम ऊखे हिसाब को दिबाओ जेहे।