महोबा शहर, तालाबन के लाने तो बोहतई जानो मानो ओर प्रसिद्ध हे। फिर भी एते को आदमी पिये के लाने पानी खा भटकत हे। सुभाष नगर बीजानगर रोड, एते के चन्द्रपाल ने 2 जून खा महोबा तहसील दिवस में दरखास दई हे। साथे जांच कर पियें के पानी देय की मांग करी हे।
चन्द्रपाल बताउत हे कि मेंने 2011 में पानी को कनेक्शन कराओ हतो। पे पानी नई पोहचत हे। ईखी केऊ दइयां दरखास भी दे चुको हों ओर जल संस्थान में सूचना भी दई हे। पे कोनऊ सुनवाई नई होत हे। जल संस्थान वाले हर महिना पानी को बिल भेज देत हे ओर पानी नई मिलत हे। मेने 5 मार्च 2013 मे 5 सौ 53 रूपइया बिल भी जमा कर चुको हों। पे पानी के लाने एते ओते भटकने परत हे। जा तो हमाये एते पानी भेजे नई हमाओ कनेक्शन काट देय। जभे पानी के लाने एते ओते भटकने हे तो कनेक्शन कराये को का फायदा। एई से मेने दुबारा से 2 जून खा डी.एम. खा दरखास दई हे।
सिविल जल निगम के सहायक अभियन्ता मुलायम सिंह ने बताओ कि ऊखो घर ऊंचाई में हे। जीसे पानी नई पोहचत हे। जल संस्थान में दरखास लिख के देय तो बिल न आहे।