धरना मा दूर संचार विभाग करमचारी

जिला बांदा। दूर संचार मा ठेकेदार के अण्डर मा काम करैं वाले जिला भर के लगभग डेढ़ सौ करमचारी 9, 10 अउर 11 फरवरी तक भूख हड़ताल करिन। या हड़ताल टेलीकाम कैजुअल एण्ड कान्ट्रैक्ट वर्कर्स यूनियन के अध्यक्षता मा कीन गे। दूर संचार विभाग से कारवाही के नाम कउनौ पहल नहीं करिस।
हड़ताल मा शामिल महादेव, सन्तोष कुमार, बृजमोहन, विजय कुमार, देवराज, कल्ली, शान्ती अउर रामपाल का कहब है कि सब चतुर्थ श्रेणी के कर्मचारी हैं। यहिमा से बहुतै लोग सन् 1980 से काम करत हैं। पांच सौ से पन्द्रह सौ तक मजदूरी दीन जात है। वा भी समय से नहीं मिलत आय। यहै मारे हम कइयौ मांगन (निर्धारित न्यूनतम मजदूरी, चेक द्वारा सीधे बैंक खाता मा मजदूरी जमा करैं, लम्बित मजदूरी, कइयौतान के भत्ता, सुरक्षा, छटनी करैं के बाद रोक अउर निकाले गे मजदूरन का वापस लें) का लइके हड़ताल मा हन। यहिके पहिले भी लखनऊ, दिल्ली तक दरखास दई चुके हन। अगर अबै भी मांग पूरी न होई पाई तौ लखनऊ मा हड़ताल करबे।
दूर संचार विभाग के मंडल अभियंता जी.डी. पटेल का कहब है कि हड़ताल करैं वाले करमचारी हमार विभाग से नहीं जुड़े आय। या मारे दूर संचार विभाग कइत से कउनौ कारवाही नहीं कीन जा सकत आय।