दो सौ राशन कार्ड मिले फर्जी

तहसीलदार गुलाब सिंह

जिला महोबा, ब्लाक कबरई, गांव रैपुरा के मजरा बनियापुरा। एते को कोटेदार अवधेश कुमार तिवारी (पुत्र नारायण दास) आठ साल से कोटा चलाउत हे। गांव के आदमियन ने ऊखे ब्लाॅक करें को आरोप लगाओ हतो। हाई कोर्ट के आदेश से जनवरी 2015 में तहसीलदार गुलाब सिंह ने जांच करी हे।
जागेश्वर (पुत्र स्वामीप्रसाद) ने बताओ कि पेहले कि पेहले नारायण दास के नाम कोटा हतो। ऊखे बाद लड़का अवधेश के नाम करा दओ हे। ऊ आदमियन खा राशन गल्ला कम देत हतो ओर ब्लाॅक बोहतई करत हतो। ईखी दरखास हमने केऊ दइयां तहसील दिवस ओर जिलापूर्ति विभाग में दई हती। हाई कोर्ट को आदेश जांच करें खा भओ।
तहसीलदार गुलाब सिंह ने कहो कि एस.डी.एम. के आदेश से कमेटी बना के जनवरी 2015 खा जांच करी हती। ओते चन्दपुरा, पचपहरा, चरखारी ब्लाक के काकुंन गांव महोबा शहर ओर छतरपुर जिला के आदमियन के कोटेदार के एते फर्जी राशन कार्ड मिले हे। हमने रिपोर्ट बना के एस.डी.एम. खा दे दई हे। कारवाही ओतई से होहे
एस.डी.एम. राकेश कुमार गुप्ता ने कहो कि हमने ए.डी.ओ. के खिलाफ सी.डी.ओ. खा लिख के भेजो ओर रिपोर्ट मांगी हे कि फर्जी राशन कार्ड केसे बने हे। रिपोर्ट आयें के बाद कोटा निरस्त कर कोटेदार के ऊपर मुकदमा लिखा के कारवाही करी जेहे।