जिला चित्रकूट, ब्लाक रामनगर, कस्बा राजापुर मा आगी लागे के घटना सउहें आयी हवै। जेहिमा लवलेश नाम का लड़का दुसरेन के घर से आगी के लपट से बाहर आवा हवै। या घर के मड़इन का कहब हवै कि लवलेश खुदै आगी लगाइस हवै। यहिके बारे मा लवलेश के परिवार वालेन का कहब हवै हमार लड़का का बोला के पड़ोसी आगी लगाइन हवै। या घटना के बारे मा मुहल्ला के मड़इन का कहब हवै कि लवलेश का एक लड़की के साथै प्रेम चलत रहै यहै कारन या घटना भे हवै।
लवलेश के महतारी नीलदान्ता का कहब हवै कि मोर लड़का का जला के जमुना जी मा फ़ेंक देते तौ हमें का पता चलत। वहिका आगी लगावै का होत तौ आपन घर मा लगावत, दुसरेन के घर कहे का जात। बाप बताइस कि वहिके पेट अउर हाथ जल गें हवै। मोर लड़का का बोलाइन रहै तौ वा चला गा रहै।
दूसर पक्ष के ललिता अउर कलावती का कहब हवै कि लवलेश का आवत नहीं देखा आय, जबै वा आगी लगा के भागे लाग हवै, तबै देखा हवै। वा दारू पिए रहा हवै यहै कारन आगी लगाइस हवै। वहिके परिवार वाले उल्टा मुकदमा लिखाइन हवै।
क्षेत्राधिकारी सुरेश प्रसाद का कहब हवै कि रपट लिख गे हवै, दूनौ पक्ष से पूछताछ चलत हवै, वहिके बाद सच्चाई का पता लागी।
रिपोर्टर- सहोद्रा
