बांदा जिला के सदर तहसील के तिंदवारी रोड के सिध्देखरन मुहल्ला मा पिछले साल लाग डामर प्लांट मड़इन का सिरदर्द बन गा हवै। वायु प्रदुषण के कारन डामर प्लांट से मड़इन के स्वास्थ्य मा बहुतै खराब असर पड़ा है यहै कारन प्रदुषण नियन्त्रण बोर्ड से 11 नवम्बर 2017 अउर 5 अप्रैल 2018 का प्लांट बंद करै के नोटिस दे के बादौ भी प्लांट का काम चालू है।
सुमन का कहब है कि डामर के कारन बच्चा बीमार पड़त है। धुल उड़त है अउर मशीन के आवाज से मड़ई सो नहीं पावत आहीं। संजय बताइस कि डीएम, कमीश्नर का दरखास दीने हन, तबै उंई प्रदुषण नियंत्रण के निरंजन शर्मा से जांच करावै का कहिन है। सुमित्रा का कहब हवै कि धुल के कारन सांस् के बीमारी होई सकत है, हेंया का खुला महौल रहा है पै अब हेंया का महौल गंदा होइगा है। रेखा का कहब है कि सुने का मिला है कि इं मशीन हटे वाली है पै पता नहीं कबै तक हटाई जइहैं।
प्रदुषण नियंत्रण बोर्ड के बड़े बाबू वीरेन्द्र का कहब है कि या दरकी नोटिस दे के बादौ भी प्लांट न हटावा जई तौ कोर्ट से कारवाही कीन जई।
रिपोर्टर- गीता देवी
