जिला महोबा, ब्लाक कबरई, गांव मझलवारा। एते की कल्पना की शादी 14 फरवरी 2014 खा हरपालपुर में ब्रजकिशोर के साथे भई हती। आरोप हे कि दहेज कम होंय को बहाना कर मारपीट करत हे। महोबा कोर्ट में 9 जून खा दहेज प्रथा को मुकदमा लगा दओ हे।
कल्पना बताउत हे कि शादी में मोये बाप ने आपने हेसिंयत से ज्यादा दान दहेज दओ हतो। कोनऊ चीज की कमी न हती। पे अब कपड़ा धोंये वाली मशीन ओर सोने की अगूठी की मांग करत हे। नई दई तो मार के घर से निकार दओ। में आठ महिना से मायके में रहत हों। अभे 3 जून चाचा ससुर के बिटिया की शादी हती। मोये ससुराल वालेन ने फोन करो हतो, में अपने बाप के साथे ससुराल गई तो मोसे पचास हजार रूपइया मांगन लगे। मे न लेय की बात कही तो मोये साथे मारपीट करी हे। एई से में 5 जून खा आपने मायके आ गई ओर 9 जून खा ब्रजकिशोर के नाम कोर्ट में दहेज प्रथा को मुकदमा लिखाओ हे।
आदमी ब्रजकिशोर बताउत हे कि में कछू नई मांगत हों। ऊ झूठो आरोप लगाउत हे, अगर मेने कोनऊ बात से मार दओ होहे तो लिवा जाये खा भी तैयार हों।