दहेज के ताई जहर पियावै कै आरोप

जिला फैजाबाद, कस्बा अयोध्या, दंत धवनकुंड। हिंआ 25 अक्टूबर 2015 का विवाहिता अंजनी के पिता माधव प्रसाद कै आरोप बाय कि हमरे बिटिया का दहेज खातिर मारत पीटत रहिन। अउर जहर खवाए दिहिन।
अंजनी कै पिता माधव प्रसाद बताइन कि अपने बिटिया कै बियाह 2013 मा खाले का पुरवा रामघाट कै रहै वाला आलोक रंजन के साथे करे रहेन। वकरे बाद से दहेज खातिर मारत पीटत रहिन। हमार बिटिया सब आई कै बतावत रही। जब उनके घरे जाई तौ मिलै नाय देत रहिन। ससुराल वाले गाड़ी कै मांग करत रहिन जवन हम दई नाय पायन। यही से हमरे बिटिया का 25 अक्टूबर का सुबेरे पति आलोक रंजन ससुर मदन पाण्डेय, सास सुमन पाण्डेय, देवर आलोक रंजन मारिन पीटिन फिर सादे कागज पै दसखत करा लिहिन वकरे बाद जबरदस्ती जहर पिलाय दिहिन। हालत ज्यादा खराब होय से जिला अस्पताल मा भर्ती कराइन।
ससुर मदन पाण्डेय कै कहब बाय कि सब झूठै फंसावै चाहा थाइन हम सब कुछ नाय करे बाटेन।