दहेज के ताई घर से निकारिन

जिला फैजाबाद, ब्लाक बीकापुर, गांव रामपुर परेई। हिंआ कै गुड़िया अपने पति के प्रताड़ना से तंग आइके 26 अप्रैल 2016 का वरिष्ठ पुलिस अधीक्षक महोदय का प्रार्थना पत्र दिहिन। अउर कहिन कि सास ससुर व पति के विरुध्द प्राथमिकी दर्ज कराइके कार्यवाही कीन जाए।
गुड़िया बताइन कि हमार शादी मई 2013 मा सरवन पुत्र रामजी गुप्ता निवासी ग्राम भीखीसराय थाना कोतवाली बीकापुर के साथे भै रही। शुरु से ही दहेज कम लावै कै ताना दियत रहिन। जबकि अस्सी हजार कै मोटरसाइकिल दियागै रहा। नवम्बर 2014 मा एक लड़की सिमरन पैदा भइन। तब कहिन बेटवा काहे नाय पैदा करिव। पति सरवन अउर सास राधिका मायके से पचास रुपया लइके आवै के ताई मारै पीटै लागिन। अउर कहिन कि बिटिया पैदा कइके खर्चा बढ़ाय दिहिव।
गुड़िया आरोप लगाइन कि पति सरवन मुम्बई लै गइन वहिं मांग पूरी करै कै दवाव बनावत रहे जब नाय मानेन तौ छोड़िके चला आयन। 14 मार्च का तहसील दिवस बीकापुर मा शिकायत दर्ज करायन। तब वहिके दरोगा के द्वारा के दबाव बनावै पै 28 मार्च का समझौता पत्र पै विदा कराइके दुबारा लै गइन। 16 अप्रैल का शराब के नशा मा गला दबायके मारिन पीटिन। गुड़िया कै कहब बाय कि पेट मा बच्चा बाय इलाज करावै के बजाय मारत पीटाथिन। जांच जिला प्रोवेशन अधिकारी का भेजागै बाय।
जिला प्रोवेशन अधिकारी रामबाबू विश्वकर्मा बताइन कि दुइनौ पक्ष कै बयान लइके जांच कराय के रिपोर्ट एस. एस.पी. का भेजी जाये फिर कार्यवाही होये।