दहेज के ताई करत प्रताड़ित

जिला अम्बेडकर नगर, ब्लाक कटेहरी, गांव बेलाबाग फत्तेपुर। हिंआ आरती वर्मा कै आरोप बाय कि दहेज की ताई ससुराल वाले कराथिन प्रताड़ित।
बेलाबाग फत्तेपुर कै रहै वाली आरती वर्मा कै आरोप बाय कि हमार शादी बहुत पहिले भै रही। सात साल बाद हमार गौना आय। तबसे हम ससुराल टीकमपारा फत्तेपुर मा रहत रहेन। अब हमरे ढ़ाई साल कै लड़की बाय। लड़की भये के बाद से हमार सास ननद झगरा कराथिन। हम अगर उनके घरे रहीथी तौ हमका अउर हमरे मेहरारु का सूई दवाई कै भी एक रुपया खर्चा नाय देतिन। हमार पति मोतीलाल अहमदा बाद मा रहाथिन। हमैं अपने साथे लै जाए का तैयार नाय बाटिन।
टीकमपारा फत्तेपुर ससुराल कै आरती कै ससुर रामजीत सास अउर ननद पूनम अउर सरोज कै आरोप बाय कि जबसे हमरे घरमा आय हइन तबसे शान्ती भंग कै दिहे हइन। कभौं अपने हाथे मिट्टी कै तन छिड़क लेइहैं वकरे बाद हमरे सबका लगइहैं। कभौं कहिहैं खाना मा जहर दै दियब। आये दिन घरमा नखरा फैलाये रहाथिन।
अकबरपुर कै महिला थाना अध्यक्ष निशा शुक्ला बताइन कि लड़की के पक्ष से प्रार्थना पत्र मिला बाय। ससुराल पक्ष का बुलवावय कै सूचना दै दीनगै बाय। दुइनौ पक्ष के आये के बाद कउनौ कार्यवाही कै जाए।