दहेज़ के लिए हिंसा का विवाद चित्रकूट जिले के रामनगर ब्लॉक में

चित्रकूट जिला मा रामनगर ब्लाक मा दहेज हिंसा का मामला सउहें आवा हवै। 2017 मा बरेठी गांव के गीता के शादी विनोद कुमार साथै भे रहै, पै गीता ससुराल मा ज्यादा दिन तक नहीं रह पाई आय। गीता के परिवार वाले का कहब हवै कि दहेज के खातिर वहिके साथै मारपीट कीन जात रहै। ससुराल वाले या आरोप का गलत बता के फंसावै का आरोप लगावत हवै।
गीता का कहब हवै कि ससुराल वाले कहत रहै कि हम तोहिका मार डालबै अउर सास मार खवावत हवै कहत हवै कि तोर बाप-महतारी दहेज नहीं दिहिन, तो तोहिका न रखबै। एक दरकी समझौता होइगा रहै, पै हुंवा जाये के बाद फेर से मारपीट करत रहै। महतारी ननकी का कहब हवै कि भैंस,पचास हजार रुपया अउर ग्यारह –ग्यारह हजार का नेग मांगत रहै। तबै हम कहे हन या बात पहिले बता देतेव, तौ हमार हैसियत होत तो करित न होत तौ न करित। पहिले से कुछौ करार नहीं भा रहै।
सास कलावती का कहब हवै कि शादी मा कुछौ नहीं मांगा आय मोर लड़का का फंसा के चली गे हवै।
रैपुरा थाना के बड़े दरोगा का कहब हवै कि जांच चलत हवै अबै रपट नहीं लिखी गे आय। सीओ कहत हवै कि या केस मा अबै कुछौ नही भा आय।

रिपोर्टर- सहोद्रा