दस साल बादौ नाय मिला दुसरे किस्त कै पैसा

जिला फैजाबाद, ब्लाक मया, गामसभा रामनगर मिश्रौली गांव शिवगढ़़। हिंआ दुई प्रधानी के पहिले कै बनीं कालोनी कै दुसरे किस्त कै पैसा आज तक नाय आय। सिर्फ दीवाल खड़ी बाय। मड़हा मा गुजारा करत हइन।
रामखिलावन, मेवालाल अउर छोटेलाल बताइन कि लगभग तेरह साल होय जात बाय। इन्द्रा आवास पास भै रहा। पूरा घर गिराय के दीवाल खड़ी कीन गै बाय। वकरी बाद से प्रधान सिकरेट्री अउर ब्लाक कै चक्कर काटत हई। दुसरी किस्त कै पैसा आय जाए। यतनी ठण्डी मा पूरा परिवार एक मड़हा मा गुजारा करत हई। दुई प्रधानी बीत गै तिसरी प्रधानी आइगै। अब देखा मिलाथै कि नाय। नये प्रधान वादा तौ करे हइन कि कालोनी कै दुसरे किस्त कै पैसा देवाउब।
ब्लाक बी.डी.ओ. कर्ताराम बताइन कि प्रधान कै जब शपथ ग्रहण होय के बाद काम होय लागे तौ ई कालोनी पूरा करावा जाये।