पूनम
जिला महोबा, ब्लाक जैतपुर,गांव मुढ़ारी। एते के बालकिशन कि 8 साल कि बिटिया पूनम 3 जनवरी 2014 से गायब हे। जीसे गांव में सनसनी फेली हे। पुलिस प्रशासन भी हाथ में हाथ धरे बेठी हे। जीसे गांव के आदमी बोहतई परेशान हे।
पूनम की मताई केशर ने बताओ कि मोये दो बच्चा हे। हमाई कोनऊ से दुश्मनी नइयां। 3 जनवरी 2014 खा कछवारे में दोनऊ जने निदाई, गुड़ाई करत रहें। ऊखें बाद 5 बजे से बिटिया खा पता नइयां। गांव के राजकुमार ओर गिरिजा शंकर मिश्रा ने बताओ कि हमें 5 जनवरी 2014 खा पता चलो हे कि एक आदमी पूनम खा लिवा के पहाड़ केती गओ हे। जभे हम पहाड़ में गये ओर आवाज दई पूनम-पूनम तो हमें एक दइयां आवाज सुनानी हे। तभई हमने कुलपहाड़ कोतवाली में फोन करो तो पुलिस आई हती। पहाड़ में हमें एक आदमी की चप्पल मिली हे। तो पुलिस कहत हे कि चप्पल से पता नई लगाओ जा सकत। ऊ दिना से न तो बिटिया मिली हे ओर न ऊखी लाश मिली हे। पुलिस आउत हे तो चक्कर लगा के भाग जात हे। अगर हमाई पूनम न मिलहें तो हम जाम लगाबी ओर आमरण अनशन करे खा मजबूर हो जेहें।
कुलपहाड़ कोतवाली के एस. ओ.घनश्याम सचान ने बताओ कि हमें तो खुद इत्ती परेशानी हे, कि बिटिया गई तो किते गई। बिटिया खा ढूढ़े की पूरी कोशिश करी जात हे। खबर लिखत समय तक ऊ बिटिया को कोनऊ पता नई चलो हे कि ऊ कहां हे।