दवा न खिलावै से बढ़त बिमारी

जिला फैजाबाद ब्लाक तारुन, गा्रमसभा सरायमनोधर गांव गनेशपुर। हिंआ गांव वालेन के अनुसार मार्च महीना से खसरा कै विमारी फैली बाय। गांव वालेन के दवा न खिलावै से विमारी बढ़त जात बाय। गांव वाले मातारानी कै प्रकोप समझ दवा खिलावै से डेरात अहैं। गांव मा यही खसरा से दुई गेदहरन कै जान भी चली गै। सुख शान्ती के ताई गांव मा पूजा पाठ भी हुवत बाय।
दिनेश बताइन कि 4 मई का एक पांच साल के बच्ची कै मउत होइगै। चेचक के बाद जीभ मा सूजन रही पानी नाय जात रहा। यही से मउत होइगै।
मीरा देवी बताइन कि हमरे गेदहरा सुमिरन के तीन चार दिन से खसरा के साथे तेज बुखार बाय। डाक्टर आवत हइन दवा दियाथिन लकिन डर के मारा केहू खिलावत नाय। प्रेमवती कै कहब बाय कि गांव मा घरे घरे खसरा भै रहा। आलोक उमेश हमरे दुई बेटवा हइन दुइनौ जने के तेज बुखार के साथ बड़ा बड़ा दाना निकला रहा।
आशाकार्यकत्री विन्दू बताइन कि मार्च महीना से यहि गांव मा खसरा कै शुरुआत भै बाय। पूरे गांव मा पैरासिटामांल बांटे रहेन। लकिन केहू दवा नाय खिलाइन। जबकि यहि गांव मा काफी गन्दगी बाय यही कारण से फैली बाय। ग्राम प्रधान मीनाक्षी पति रामानन्द पाण्डेय बताइन का यकै सूचना नाय रही जब 4 मई का एक बच्ची कै मउत होइगै तौ सूचना दिहन तब डाक्टर कै टीम आई।
जिला सी.एम.ओ प्रमोद कुमार बताइन कि गांव मा डाक्टर कै टीम भेजी जात बाय। दवा दइके जल्दी खसरा से निजात दिलाय जाये।